خلیج عرب کی پہلی ملٹی اسٹوری فیکٹری صنعتی زون کے قیام کی طرف قدم
دمام: سعودی اتھارٹی برائے صنعتی شہر اور ٹیکنالوجی زونز (مدن) نے دمام کے پہلے صنعتی شہر میں اپنی نوعیت کے منفرد منصوبے "ملٹی اسٹوری فیکٹری” کے آغاز کا اعلان کیا ہے، جو خلیج عرب میں اپنی طرز کا پہلا منصوبہ ہے۔
یہ منصوبہ پائیدار عمودی صنعتی ترقی کے ماڈل کی نمائندگی کرتا ہے، جس کا مقصد زمین کے مؤثر استعمال اور سرمایہ کاروں کے لیے لچکدار حل فراہم کرنا ہے۔ آٹھ منزلہ عمارت 7,500 مربع میٹر پر پھیلی ہوئی ہے، جس میں 78 صنعتی یونٹس شامل ہیں جن کا رقبہ 156 سے 251 مربع میٹر کے درمیان ہے۔ یہ یونٹس کاروباری حضرات اور چھوٹے و درمیانے درجے کے اداروں کی بڑھتی ضروریات کو مدنظر رکھ کر تیار کیے گئے ہیں۔
مدن کے مطابق یہ منصوبہ مکمل طور پر سروس شدہ اور ریڈی میڈ جگہیں فراہم کر کے کاروبار کے آغاز کی رفتار بڑھائے گا اور ایک مربوط صنعتی نظام تشکیل دے گا، جو صنعتکاروں کو عملی سہولت اور تیز رفتار پیداوار کا موقع فراہم کرے گا۔
یہ منصوبہ چھوٹے اور درمیانے درجے کے کاروباری اداروں کی ترقی میں مدن کے غیر متزلزل عزم کی عکاسی کرتا ہے، جو معیشت کو فروغ دینے اور روزگار کے مواقع پیدا کرنے کا بڑا ذریعہ ہے۔ اس منصوبے کا مقصد الیکٹرانکس، تھری ڈی پرنٹنگ، فوڈ، میڈیکل اور فارماسیوٹیکل انڈسٹریز سمیت اہم شعبوں کو سہارا دینا ہے۔
مدن نے کہا کہ ایسے معیاری منصوبے سعودی عرب کو ایک عالمی صنعتی مرکز بنانے میں معاون ہیں، جبکہ جدید انفراسٹرکچر اور اسٹریٹجک لاجسٹک لوکیشنز سے مملکت کی صنعتی تبدیلی میں قیادت کے کردار کو مزید مضبوطی ملتی ہے۔
فی الحال مدن مملکت میں 39 صنعتی شہروں کی نگرانی کر رہا ہے جن میں 9,000 سے زائد صنعتی، لاجسٹکس اور سرمایہ کاری کی سہولیات موجود ہیں۔ ان کی مجموعی سرمایہ کاری 463 بلین سعودی ریال سے زیادہ ہے اور یہ 220 ملین مربع میٹر کے ترقی یافتہ رقبے پر محیط ہیں۔ مدن نجی شعبے کے تیار کردہ شہروں اور صنعتی کمپلیکسز کو لائسنس اور بنیادی ڈھانچے کی سہولیات بھی فراہم کرتا ہے۔
