مخصوص نشستوں کی بندر بانٹ ، ن لیگ کو بڑا حصہ مل گیا

اسلام آباد ۔۔۔مقصود منتظر

اسمبلیوں کی مخصوص نشستوں کے حوالے سپریم کورٹ کے فیصلے کے بعد عملدرآمد کا مرحلہ شروع ہوگیا ۔ الیکشن کمیشن نے سپریم کورٹ کے فیصلے کے بعد مخصوص نشستوں کی بحالی کا نوٹیفکیشن جاری کردیا، قومی اور صوبائی اسمبلیوں کی مجموعی طور پر 74 مخصوص نشستیں بحال ہوگئیں ، مسلم لیگ ن ایک سو چوبیس نشستوں کیساتھ ایوان زیریں کی سب سے بڑی جماعت بن گئی  

 ، الیکشن کمیشن نے قومی اور صوبائی اسمبلیوں میں مخصوص نشستوں کی بحالی کا نوٹیفکیشن جاری کردیا ، الیکشن کمیشن کے نوٹیفیکشن کے بعد مسلم لیگ ن کی تیرہ نشستیں بحال ہو گئیں۔

قومی اسمبلی میں خیبرپختونخوا سے خواتین کی 5 مخصوص نشستیں بحال کردی گئیں جس کے بعد مسلم لیگ (ن) اور پیپلزپارٹی کو 2،2 جبکہ جے یو آئی کو ایک نشست ملی ہے۔ پنجاب سے قومی اسمبلی میں خواتین کی 11مخصوص نشستیں بحال کی گئی ہیں جن میں سے  10 نشستیں مسلم لیگ (ن) اور ایک پیپلز پارٹی کو ملی ہے۔ الیکشن کمیشن کے مطابق قومی اسمبلی میں اقلیتوں کی 3 نشستیں بھی بحال کی گئی ہیں جس میں سے مسلم لیگ (ن)، پیپلزپارٹی اور جے یو آئی کو ایک ایک اقلیتی نشست ملی ہے

قومی اسمبلی میں خواتین کی 12 اور اقلیتوں کی ایک مخصوص نشست ملنے کے بعد ایون زیریں میں مسلم لیگ ن کے ارکان کی تعداد ایک سو تئیس ہو گئی ۔ خواتین کی تین اور اقلیتوں کی ایک مخصوص نشست ملنے کے بعد پیپلز پارٹی کے ارکان کی قومی اسمبلی میں تعداد چوہتر ہو گئی ۔ ایک خاتون اور ایک اقلیتی نشست پر بحالی سے قومی اسمبلی میں جے یو آئی کے ارکان کی تعداد دس تک پہنچ گئی ہے

خیبرپختونخوا اسمبلی کی بات کریں تو خواتین کی21  مخصوص نشستیں بحال ہوئیں جن میں جے یو آئی کو 8، (ن) لیگ کو 6 اور پیپلز پارٹی کو 5 نشستیں ملی ہیں جبکہ تحریک انصاف پارلیمنٹیرین اور اے این پی کو بھی ایک ایک مخصوص نشست ملی ہے ۔ خیبرپختونخوا اسمبلی میں اقلیتوں کی 4 نشستیں بھی بحال کی گئی ہیں جن میں جے یو آئی کو 2، (ن) لیگ اور پیپلزپارٹی کو ایک ایک اقلیتی نشست ملی ہے

پنجاب اسمبلی میں خواتین کی 24 مخصوص نشستیں بحال کی گئی ہیں جن میں 21 نشستیں (ن) لیگ، ایک پیپلزپارٹی، ایک استحکام پاکستان پارٹی اور ایک مسلم لیگ (ق) کو ملی ہے۔ پنجاب اسمبلی میں اقلتیوں کی 3نشستیں بحال کی گئیں جن میں (ن) لیگ کو اقلیتوں کی 2 اور پیپلزپارٹی کو ایک نشست ملی ۔ سندھ اسمبلی میں خواتین کی 2 مخصوص نشستیں بحال کی گئی ہیں جن میں خواتین کی ایک نشست پیپلزپارٹی اور ایک ایم کیو ایم کو ملی ہے

الیکشن کمیشن نے جنرل نشستوں پر کامیاب امیدواروں کو تحریک انصاف کا امیدوار قراردینے کا نوٹیفکیشن واپس لےلیا، یہ امیدوار قومی اسمبلی، پنجاب اسمبلی، خیبرپختونخوا اسمبلی، سندھ اسمبلی سے جنرل نشستوں پرکامیاب ہوئے تھے