آڈٹ رپورٹ نے ایف بی آر کی کارکردگی کا پول کھول دیا

ایف بی آر آڈٹ رپورٹ میں سپر ٹیکس کی مد میں 168 ارب روپے کی ٹیکس چوری کا انکشاف ہوا، آڈٹ حکام کے مطابق ایف بی آر نے مؤثر کارروائی نہیں کی۔

 اب تک صرف 4 کروڑ 80 لاکھ روپے ریکور اور 1 ارب 94 کروڑ کے نوٹس جاری کیے گئے۔

رپورٹ کے مطابق سپر ٹیکس 2022 میں 15 کروڑ روپے سے زائد آمدن پر نافذ کیا گیا تھا، تاہم 2022-23 اور 2023-24 میں 1026 افراد نے سپر ٹیکس جمع نہیں کرایا۔

 آڈٹ حکام کا کہنا ہے کہ ایف بی آر نے نہ تو قانونی کارروائی کی اور نہ ہی کوئی مؤثر ایکشن لیا، حالانکہ فروری اور نومبر 2024 میں ادارے کو اس بے ضابطگی سے آگاہ کیا گیا تھا۔

 حکام نے بتایا کہ جنوری 2025 میں ایف بی آر کو کارروائی شروع کرنے کی ہدایت دی گئی لیکن اب تک صرف 4 کروڑ 80 لاکھ روپے ریکور ہوئے ہیں جبکہ 1 ارب 94 کروڑ روپے کے نوٹس جاری کیے گئے۔

ایف بی آر کے مطابق 6 ارب 33 کروڑ روپے کی ریکوری کے کیسز عدالتوں میں زیر سماعت ہیں، تاہم 160 ارب روپے کی ریکوری کے لیے شروع کی گئی کارروائی بے نتیجہ رہی۔

 آڈٹ حکام نے ایف بی آر کو ریکوری کا عمل تیز کرنے اور اس حوالے سے تفصیلی جواب فراہم کرنے کی سفارش کی ہے۔