پنجاب کے سیلاب متاثرہ علاقوں میں این ڈی ایم اے کا امدادی آپریشن جاری
اسلام آباد:راجہ سہیل سرفراز۔۔ وزیر اعظم کی خصوصی ہدایت پر نیشنل ڈیزاسٹر مینجمنٹ اتھارٹی (این ڈی ایم اے) نے پنجاب کے سیلاب متاثرہ علاقوں میں امدادی سرگرمیاں تیز کر دی ہیں۔ خانیوال کے متاثرین کے لیے ایک ہزار خیمے فراہم کیے گئے ہیں جن میں 670 خیمے سکھر سے 13 ٹرکوں کے ذریعے اور 330 خیمے اسلام آباد وئیر ہاؤس سے 5 ٹرکوں کے ذریعے روانہ کیے گئے۔
این ڈی ایم اے کے مطابق اب تک پنجاب کو 2270 ٹن امدادی سامان فراہم کیا جا چکا ہے جس میں خیمے، کمبل، مچھر دانیاں، پانی کے فلٹریشن پلانٹ، رضائیاں، فولڈنگ بیڈ، پانی کے کین اور 17 کشتیاں شامل ہیں۔ مجموعی طور پر پنجاب کے سیلاب متاثرین کے لیے 36 ہزار خیمے فراہم کیے جا چکے ہیں۔
ترجمان این ڈی ایم اے کا کہنا ہے کہ ادارہ سول، عسکری اور فلاحی اداروں کے ساتھ مکمل رابطے میں ہے اور امدادی سرگرمیوں کی ہر وقت نگرانی کی جا رہی ہے تاکہ متاثرین کو بروقت سہولتیں فراہم کی جا سکیں۔
