کشمیر میں منشیات کیخلاف منفرد آگاہی مہم، سڑکوں پر ٹانگے چل پڑے

سوپور،دی مائنڈڈاٹ پی کے

کشمیر کے شمالی ضلع بارہ مولہ کی تحصیل سوپور میں  ضلعی انتظامیہ نے منشیات کے بڑھتے ہوئے رجحان کے خلاف ایک منفرد آگاہی مہم شروع کی ہے، جس میں روایتی ٹانگہ (گھوڑا گاڑی) کو استعمال کیا گیا تاکہ عوام، خصوصاً نوجوانوں تک پیغام مؤثر انداز میں پہنچایا جا سکے۔

پیر کے روز منعقدہ اس مہم میں شہریوں کی بڑی تعداد نے شرکت کی، جبکہ سول سوسائٹی اور کیمسٹ تنظیموں نے بھی بھرپور حصہ لیا۔ حکام کے مطابق اس اقدام کا مقصد زیادہ سے زیادہ لوگوں کو منشیات کے مضر اثرات سے آگاہ کرنا ہے۔

ایڈیشنل ڈپٹی کمشنر شبیراحمد رینا نے میڈیا سے گفتگو کرتے ہوئے کہا کہ حکومت کی ہدایات کے مطابق ہر پنچایت میں روزانہ کی بنیاد پر آگاہی پروگرامز منعقد کیے جا رہے ہیں تاکہ نوجوان اپنی صحت، معاشرے اور مستقبل کو محفوظ بنانے کی اہمیت کو سمجھ سکیں۔

اس سے قبل کیمسٹ اینڈ ڈرگسٹ ایسوسی ایشن نے شہر میں ایک ریلی بھی نکالی، جو ڈک بنگلہ سے شروع ہو کر کلاک ٹاور تک پہنچی۔ اس موقع پر تحصیلدار شیخ طارق نے کہا کہ منشیات فروشوں کے خلاف کارروائیاں اس وقت تک جاری رہیں گی جب تک اس ناسور کا مکمل خاتمہ نہیں ہو جاتا۔مقامی شہریوں نے ٹانگہ کے ذریعے آگاہی مہم کو سراہتے ہوئے اسے ایک مؤثر اور منفرد قدم قرار دیا۔