استغاثہ کے تمام گواہان کے بیانات مکمل، بانی پی ٹی آئی اور بشریٰ بی بی عدالت میں پیش
راولپنڈی:( سٹاف رپورٹر)اڈیالہ جیل میں بانی پاکستان تحریک انصاف اور ان کی اہلیہ بشریٰ بی بی کے خلاف توشہ خانہ ریفرنس کی سماعت اسپیشل جج سینٹرل شاہ رخ ارجمند نے کی۔
دورانِ سماعت وکلائے صفائی ارشد تبریز اور ظہیر عباس چوہدری عدالت میں پیش ہوئے، جبکہ استغاثہ کی نمائندگی اسپیشل پبلک پراسیکیوٹر ایف آئی اے ذوالفقار عباس نقوی اور عمیر مجید ملک نے کی۔ سماعت کے دوران استغاثہ کے آخری دو گواہان، نیب افسر محسن ہارون اور اسسٹنٹ ڈائریکٹر ایف آئی اے شاہد پرویز کے بیانات قلمبند کر لیے گئے۔ ان دونوں گواہان پر وکلائے صفائی 24 ستمبر کو جرح کریں گے۔
عدالت کو بتایا گیا کہ مقدمے میں استغاثہ کے تمام گواہان کی شہادت مکمل ہو چکی ہے اور مزید کوئی گواہ پیش نہیں کیا جائے گا۔ کیس میں مجموعی طور پر 20 گواہان کے بیانات ریکارڈ کیے گئے، جن میں سے 18 پر جرح مکمل ہو چکی ہے۔
سماعت کے دوران بانی پی ٹی آئی اور بشریٰ بی بی کو جیل سے عدالت میں پیش کیا گیا، جبکہ بانی پی ٹی آئی کی تینوں بہنیں اور بشریٰ بی بی کی بیٹی مہرالنساء احمد بھی کمرہ عدالت میں موجود تھیں۔
