الیکشن کمیشن نے پنجاب میں بلدیاتی انتخابات کرانے کا فیصلہ کر لیا
الیکشن کمیشن آف پاکستان نے پنجاب میں بلدیاتی انتخابات کے انعقاد کا فیصلہ کرتے ہوئے چیف سیکرٹری پنجاب کو انتخابی تیاریوں کی ہدایات جاری کر دی ہیں۔
سرکاری مراسلے کے مطابق بلدیاتی انتخابات پنجاب لوکل گورنمنٹ ایکٹ 2025 کے تحت کرائے جائیں گے۔ الیکشن کمیشن نے 9 اکتوبر 2025 کو جاری کیا گیا حلقہ بندیوں کا شیڈول واپس لے لیا ہے اور پنجاب حکومت کی جانب سے چار ہفتوں کی مہلت کی درخواست منظور کر لی ہے۔
مراسلے میں کہا گیا ہے کہ حلقہ بندی اور حد بندی کے قواعد کی تیاری کے لیے پنجاب حکومت کو چار ہفتے دیے گئے ہیں، جبکہ بلدیاتی انتخابات سے متعلق نقشے اور اعدادوشمار بھی طلب کر لیے گئے ہیں۔
الیکشن کمیشن نے واضح کیا ہے کہ اگر مقررہ مدت میں قواعد و ڈیٹا فراہم نہ کیا گیا تو معاملہ کمیشن میں سماعت کے لیے مقرر کیا جائے گا۔
ذرائع کے مطابق، الیکشن کمیشن جلد ہی نیا حلقہ بندی شیڈول جاری کرے گا تاکہ بلدیاتی انتخابات کا عمل بروقت اور شفاف انداز میں مکمل کیا جا سکے۔
