قومی مفادات کے منافی ہر نظریہ سے ٹکرائیں گے،لیگی قیادت

مسلم لیگ ن ہر صورت نظریہ الحاق پاکستان پر سختی سے کاربند رہےگی  ۔ کسی ایسے سیاسی عمل کا حصہ نہیں بنے گی جس میں اس کی مشاورت شامل نا ہو۔ پارلیمانی پارٹی کا اجلاس

اسلام آباد ۔۔

پاکستان مسلم لیگ ن آزاد کشمیر کی پارلیمانی پارٹی کا اجلاس صدر مسلم لیگ ن شاہ غلام قادرکی زیرصدارت جموں کشمیر ہاوس میں منعقد ہوا۔ اجلاس میں سابق وزیراعظم و پارلیمانی لیڈر راجہ محمد فاروق حیدر خان، کرنل ریٹائرڈ وقار نور ،سردار عامر الطاف، احمد رضا قادری ،راجہ محمد صدیق ،چوہدری اسماعیل، اکمل سرگالہ، نثارہ عباسی نے شرکت کی ۔

اجلاس میں افغانستان کی جانب سے پاکستان کی سالمیت کی خلاف ورزی کرتے ہوئے پاکستان میں دراندازی کی شدید مذمت کرتے ہوئے پاک فوج کی جانب سے فتنہ الخوارج اور فتنہ الہندوستان کو منہ توڑ جواب دینے پر خراج تحسین پیش کیا گیا اجلاس میں ہندوستانی وزراء اور بھارتی مکار لیڈروں کی جانب سے آزادکشمیر پر قبضہ کے بیانات کی شدید مذمت کرتے ہوے اس عزم کا اعادہ کیا گیا کہ آزادکشمیر کے عوام پاکستان کے ساتھ ملکر خطے کے چپے چپے کا انشاءاللہ بھرپور دفاع کرینگے۔

 اجلاس میں آزادکشمیر کی موجودہ سیاسی صورتحال پر طویل مشاورت کے بعد فیصلہ کیا گیا کہ تمام صورتحال سے مرکزی قیادت کو آگاہ کیا جائے گا موجودہ صورتحال میں مسلم لیگ ن کسی ایسے فیصلے کا حصہ نہیں بنے گی جس سے مسلہ کشمیر، کشمیری عوام یا مسلم لیگ کے کارکنوں کے مفاد کو زک پہنچے ،مسلم لیگ ن آزادکشمیر کے عوام کو یقین دلاتی ہے کہ اس کی پارلیمانی پارٹی و جماعتی تنظیم ان کی امنگوں کی ترجمان ہے اور ان کو کسی طالع آزما کے رحم و کرم پر نہیں چھوڑا جائیگا ۔

مسلم لیگ ن ہر صورت نظریہ الحاق پاکستان پر سختی سے کاربند رہیگی  اور کسی بھی ایسے نظریہ کا بھرپور مقابلہ کریگی جو آباو اجداد کی قربانیوں جدوجہد اور قومی مفادات کے منافی ہو ،اجلاس میں فیصلہ کیا گیا کہ مسلم لیگ ن کسی ایسے سیاسی عمل کا حصہ نہیں بنے گی جس میں اس کی مشاورت شامل نا ہو،اجلاس میں اس عزم کا اعادہ کیا گیا کہ مہاجرین جموں کشمیر ریاست جموں وکشمیر کا جزو لاینفک ہیں اور ان کے ووٹ کے حق کا بھرپور تحفظ کیا جائیگا