اسلام آباد ۔۔ وفاقی وزارت خزانہ نے نومبر میں مہنگائی کی شرح 5 سے 6 فیصد تک رہنے کا امکان ظاہر کر دیا ۔ وزارت خزانہ کی آوٹ لک رپورٹ کے مطابق خوراک کی قیمتوں اور زرعی پیداوار کے دباؤ سے مہنگائی میں اضافے کا امکان ہے ۔
رپورٹ کے مطابق پاکستان کی معاشی صورتحال محتاط طور پر مثبت دکھائی دے رہی ہے ۔ صنعتی سرگرمیوں میں بتدریج بہتری جاری ہے ۔معاشی اصلاحات کے نفاذ سے اقتصادی سرگرمیوں میں استحکام رہے گا ۔ فصلوں کا مجموعی منظرنامہ ملا جلا رجحان ظاہر کر رہا ہے ۔ مناسب زرعی اِن پُٹس کی دستیابی سے صورتحال بہتر ہونے کی توقع ہے ۔
وزارت خزانہ کے مطابق حکومت کے معاون اقدامات سے سپلائی میں بہتری متوقع ہے ۔ ربیع سیزن کے دوران زرعی سپلائی کے استحکام کا امکان ہے ۔معیشت بتدریج استحکام کی راہ پر گامزن ہے ۔ساختی اصلاحات کے عملی نتائج ظاہر ہونا شروع ہوچکے ہیں ۔ مالی نظم و ضبط میں بہتری، محصولات میں اضافہ ہوا ہے ۔حکومتی اخراجات میں محتاط حکمتِ عملی برقرار رہے گی ۔ترسیلات زر میں اضافہ، معاشی صورتحال مزید مستحکم دکھائی دے رہی ہے ۔ایل ایس ایم سیکٹر اور آئی ٹی برآمدات میں اضافہ ہوا ہے ۔
رپورٹ میں کہا گیا ہے کہ عوامی قرضہ 1,371 ارب روپے کم ہوگیا ۔پانچ سال بعد پہلی بار ایک سہ ماہی میں قرض میں نمایاں کمی ہوئی ۔مہنگے قرضوں کی قبل از وقت ادائیگی سے مالی خطرات میں کمی کا امکان ہے ۔اقتصادی استحکام کے لیے حکومت کی حکمتِ عملی مؤثر ثابت ہو رہی ہے ۔
