آسٹریلیاکے معروف کرکٹر ڈیوڈ وارنر حالیہ دنوں میں اپنے اداکاری کے شوق کی وجہ سے کافی توجہ حاصل کر رہے ہیں۔ کرونا لاک ڈاؤن سے پہلے وارنر کی زندگی کرکٹ کے گرد گھومتی تھی، مگر لاک ڈاؤن کے دوران انہوں نے اپنی بیوی کے ساتھ تفریحی ٹک ٹاک ویڈیوز بنانی شروع کیں، جن میں وہ مشہور تیلگو گانوں پر ایکٹنگ کیا کرتے تھے۔ جس کی وجہ سے انہیں نئے قسم کے فالورز ملنا شروع ہوگئے، بہت سے لوگ ان کی مزاحیہ پرفارمنسز سے محظوظ ہوئے۔
وارنر کے پسندیدہ لمحات میں سے ایک ان کا آلّو ارجن کی فلم پشپا میں کیے گئے کردار کی نقل کرنا تھا۔ انہوں نے آئی پی ایل کے دوران بارہا پشپا کے گانوں پر اپنے مشہور ڈانس مووز دکھائے، جس سے شائقین بہت محظوظ ہوئے۔ ڈیوڈ وارنر نے بارہا کرکٹ گراؤنڈ میں پشپا کے مشہور سٹائل "پشپا، جھکے گا نہیں سالا” پر ایکٹ کیا. اس کے علاوہ وارنر نے مشہور ہدایتکار راجامولی کے ساتھ ایک مزاحیہ اشتہار میں کام کیا اس اشتہار میں ان کی بہترین کامیڈی ٹائمنگ نے ناظرین کو مزید متاثر کیا۔
تیلگو سنیما کے مداح ڈیوڈ وارنر کو بہت پسند کرتے ہیں تیلگو سینما کے مداحوں نے سوشل میڈیا پر وارنر کے لئے پشپا کے سیکوئل میں ایک چھوٹا سا کیمو رکھنے کے لیے مسلسل ٹرینڈ چلائے رکھا۔ تاہم حال ہی میں وارنر کی ایک تصویر منظر عام پر آئی ہے جس میں وہ ایک ہیلی کاپٹر سے اترتے ہوئے ہاتھ میں گن پکڑے نظر آئے جس نے مزید قیاس آرائیوں کو جنم دیا کہ شاید وہ کسی انڈین فلمی پراجیکٹ میں شامل ہو رہے ہیں۔ مداحوں کی امید ہے کہ یہ فلم پشپا 2 ہی ہوگی۔
ڈیوڈ وارنر نے کرکٹ کے میدان میں تو چھکے چوکے لگاکر دھواں دار بیٹنگ کرتے ہیں اب دیکھنا یہ ہے کہ کیا وہ اداکاری کے میدان میں بھی ایسے ہی چھکے چوکے مار پاتے ہیں یا نہیں، اگر وہ پشپا جیسی مشہور فلم میں نظر آتے ہیں، تو یہ ان کی کرکٹ اور فلمی دنیا دونوں میں مزید مقبولیت کا باعث بن سکتا ہے۔ ویسے آپ کو بتا دیں ڈیوڈ وارنر کے فین پاکستان میں بھی بہت ہیں حالانکہ ڈیوڈ وارنر ہر بار پاکستانی ٹیم کے خلاف کھل کر اور اچھا پرفارم کرتے ہیں، انڈیا میں جو ورلڈ کپ ہوا تھا اس میں بھی انہوں نے بابر الیون کی خوب کلاس لی تھی.
