گلگت: جرمنی کی خاتون کوہ پیما لاؤرا ڈالمائر گلگت بلستان میں کوہ پیمائی کی ایک مہم کے دوران حادثے میں ہلاک ہو گئیں ہیں۔ دو روز قبل ضلع گانچھے کی ہوشے وادی میں چٹانیں گرنے کے ایک حادثے کی زد میں آ گئی تھیں۔
حادثے کے وقت ان کے ہمراہ ساتھی کوہ پیما مارینا ایفا بھی موجود تھیں، جنہوں نے ہنگامی سگنل بھیجا اور منگل کے روز ریسکیو ٹیم کی مدد سے بیس کیمپ تک پہنچنے میں کامیاب ہو گئیں۔ تاہم، ڈالمائر پہاڑ پر ہی زخمی حالت میں پھنس گئی تھیں اور ان تک فوری رسائی ممکن نہ ہو سکی۔
یہ حادثہ پیر کے روز ضلع گانچھے کی ہوشے وادی میں پیش آیا، جب لائلہ پیک پر تقریباً 5,700 میٹر کی بلندی پر اچانک چٹانیں گر پڑیں۔ ان ٹیموں میں تین امریکی اور ایک جرمن کوہ پیماؤں سمیت چار غیر ملکی کوہ پیماؤں اور دو مقامی پورٹرز بھی شامل تھے۔
لاؤرا ڈالمائر کون تھیں؟
جرمن اولمپک چیمپئن لاؤرا ڈالمائر کا شمار اس صدی کی کامیاب ترین جرمن بیاتھلون ایتھلیٹس میں ہوتا ہے۔ انہوں نے 2018 میں جنوبی کوریا کے شہر پیونگ چانگ میں ہونے والے سرمائی اولمپکس میں دو طلائی تمغے جیتے، جبکہ عالمی چیمپئن شپ میں مجموعی طور پر سات ٹائٹل اپنے نام کیے۔
