انسانی حقوق کی تنظیمیں یاسین ملک کو بچائیں

نیویارک ۔۔۔ جموں کشمیر لبریشن فرنٹ نارتھ امریکہ نے پارٹی صدر امتیاز خان کی قیادت میں نیویارک میں بھارتی قونصلیٹ کے باہر جے کے ایل ایف کے زیر حراست چیئرمین یاسین ملک کے ساتھ بھارتی غیر انسانی رویے کے خلاف احتجاجی مظاہرہ کیا۔

احتجاج میں مقامی جے کے ایل ایف قیادت کے علاوہ بڑی تعداد میں کشمیری امریکیوں بشمول بچوں اور خواتین نے شرکت کی۔  درامتیاز خان، ممبر سپریم کونسل محمد حلیم خان، سینئر لیڈران انجینئر قاسم کھوکھر، ترجمان جے کے ایل ایف (این اے) راجہ مختار اور دیگر نے اس موقع پرخطاب کیا جبکہ جنرل سیکرٹری شفیق اشرف نے تقریب کی نظامت کی۔

آزاد کشمیر میں کوٹہ سسٹم کیوں ناگزیر ہے؟

مظاہرین نے یاسین ملک اور دیگر کشمیریوں کی آزادی پسند سیاسی قیدیوں کے تئیں بھارتی رویے کے خلاف بلند آواز میں نعرے لگائے۔ انہوں نے مظاہرے کے دوران آزادی کے حق میں اور بھارت مخالف نعرے لگائے۔

مظاہرین نے یاسین ملک کی عمر قید کو سزائے موت میں تبدیل کرنے کے بھارتی منصوبے کی مذمت کی جس میں ان کے خلاف بنائے گئے من گھڑت اور سیاسی بنیادوں پر مقدمات درج کیے گئے۔

انہوں نے یاسین ملک کی بھارتی جیل سے فوری اور غیر مشروط رہائی کا مطالبہ کیا۔ انہوں نے بھارتی جیلوں سے آزادی پسند تمام سیاسی قیدیوں کی رہائی کا بھی مطالبہ کیا۔ مقررین نے مہذب دنیا اور انسانی حقوق کی تنظیموں سے اپیل کی کہ وہ مداخلت کرکے یاسین ملک کی جان بچائیں۔