زمبابوے  نے آسٹریلیا کو  23 رنز سے شکست دے دی 

زمبابوے نے شاندار کارکردگی کا مظاہرہ کرتے ہوئے آسٹریلیا کو ٹی ٹوئنٹی میچ میں 23 رنز سے شکست دے دی۔

میچ میں آسٹریلیا نے زمبابوے کے خلاف ٹاس جیت کر پہلے فیلڈنگ کا فیصلہ کیا۔ کپتان مچل مارش کی عدم موجودگی میں ٹیم کی قیادت ٹریوس ہیڈ نے کی۔

پہلے بیٹنگ کرتے ہوئے زمبابوے نے مقررہ 20 اوورز میں 2 وکٹوں کے نقصان پر 169 رنز اسکور کیے۔ اوپنر برائن بینیٹ 64 رنز بنا کر نمایاں رہے جبکہ کپتان سکندر رضا نے 25 رنز کی ناقابل شکست اننگز کھیلی۔

مارومانی اور رائن برل نے بالترتیب 35، 35 رنز بنا کر ٹیم کے اسکور میں اہم کردار ادا کیا۔

170 رنز کے ہدف کے تعاقب میں آسٹریلوی ٹیم مقررہ 20 اوورز میں 146 رنز بنا کر آؤٹ ہو گئی اور یوں زمبابوے نے 23 رنز سے کامیابی اپنے نام کی۔

ٹاس کے بعد گفتگو کرتے ہوئے ٹریوس ہیڈ نے کہا کہ اسٹیو اسمتھ ابھی ٹیم کو جوائن نہیں کر سکے اور دو روز قبل تک گولف کھیل رہے تھے۔ انہوں نے بتایا کہ ٹیم میں دو تبدیلیاں کی گئی ہیں، کوپر کونولی اور زیویئر بارٹلیٹ کی جگہ بین ڈوارشیئس اور ٹم ڈیوڈ کو شامل کیا گیا۔

دوسری جانب زمبابوے کے کپتان سکندر رضا کا کہنا تھا کہ وکٹ بیٹنگ کے لیے سازگار ہے تاہم وقت کے ساتھ سلو ہو سکتی ہے، اسی لیے ٹیم ایک اضافی اسپنر کے ساتھ میدان میں اتری۔ انہوں نے یہ بھی بتایا کہ 2007 کے ٹی ٹوئنٹی ورلڈکپ میں آسٹریلیا کے خلاف وننگ شاٹ کھیلنے والے برینڈن ٹیلر اس میچ میں دستیاب نہیں تھے۔

زمبابوے کی اس جیت کو ٹی ٹوئنٹی کرکٹ میں ایک اہم اپ سیٹ قرار دیا جا رہا ہے۔