لاہور: وائس چیئرپرسن پنجاب سوشل پروٹیکشن اتھارٹی، محترمہ جہاں آراء وٹو نے سندس فاؤنڈیشن کا دورہ کیا، جہاں انہوں نے زیر علاج تھیلیسیمیا اور ہیموفیلیا کے مریض بچوں سے ملاقات کی اور ان کی عیادت کی۔ محترمہ جہاں آراء وٹو نے فاؤنڈیشن کے مختلف شعبہ جات کا معائنہ کیا اور مریضوں میں تحائف تقسیم کیے۔
جہاں آراء وٹو نے مریض بچوں اور ان کے اہل خانہ کے ساتھ وقت گزارا، جس سے نہ صرف بچوں کے چہروں پر خوشی کے رنگ بکھر گئے بلکہ ان کے حوصلے بھی بلند ہوئے۔
سندس فاؤنڈیشن کے میڈیکل ڈائریکٹر ڈاکٹر عدنان گیلانی نے محترمہ جہاں آراء وٹو کو ادارے کی خدمات پر تفصیلی بریفنگ دی۔ انہوں نے بتایا کہ سندس فاؤنڈیشن 7,000 سے زائد تھیلیسیمیا کے مریضوں کو مفت علاج اور ادویات فراہم کرتی ہے، جن کی زندگی کا انحصار باقاعدہ خون کی منتقلی پر ہے۔ ڈاکٹر عدنان گیلانی نے ادارے کے جامع علاج کے منصوبے، مریضوں کی رہنمائی، اور ان کی زندگی کے معیار کو بہتر بنانے کے لیے فراہم کی جانے والی آگاہی کے حوالے سے بھی تفصیلات پیش کیں۔
وائس چیئرپرسن جہاں آراء وٹو نے سندس فاؤنڈیشن کی خدمات کو بے حد سراہا اور کہا کہ یہ ادارہ مریضوں اور ان کے خاندانوں کے لیے امید اور زندگی کا ذریعہ ہے۔ انہوں نے فاؤنڈیشن کے مشن میں مکمل تعاون جاری رکھنے کا عزم ظاہر کرتے ہوئے کہا کہ وہ مستحق مریضوں کی زندگی کو بہتر بنانے کے لیے ہر ممکن اقدامات کریں گی۔
اس موقع پر سندس فاؤنڈیشن کے دیگر اعلیٰ عہدیداران، جن میں ڈائریکٹر فنانس علی رؤف اور مینیجر مارکیٹنگ کمیونیکیشن، پی آر اور میڈیا عمران مہر شامل تھے، بھی موجود تھے۔
دورے کے اختتام پر محترمہ جہاں آراء وٹو نے سندس فاؤنڈیشن کی خدمات کی تعریف کرتے ہوئے کہا کہ ادارے کی یہ کاوشیں انسانیت کی بہترین مثال ہیں اور وہ اس نیک مشن میں ہر ممکن تعاون فراہم کریں گی۔
